Президенттик стипендия - 2024

2024-12-26 04:13:18 47

16-декабрда президент Садыр Жапаров 2023-2024-окуу жылынын жыйынтыгы боюнча жогорку окуу жайларынын 90 студентине президенттин мактоо баракчасы жана 60 миң сом өлчөмүндө стипендия тапшырылды. 90 студенттин катарында Эл аралык билим берүү программаларынын жогорку меатебинин "Математика жана компьютердик илимдер" багытынын студенти Матиева Беназир Эсенжановна да президенттик стипендияга ээ болду. Кыргыз Республикасынын Президенти Садыр Жапаров өз сөзүндө белгилегендей, Президенттик стипендия бул жөн эле сыйлык эмес. Бул – тигил же бул тармактын кесипкөй адиси болууга жан үрөп, алдына бийик максаттарды койгон студенттердин эмгегин баалоонун, дараметин колдоонун, талантын ачууга шык-дем берүүнүн белгиси. “Биз силердин билимиңерди баалоо менен өлкөбүздүн келечегине инвестиция кылып жатабыз деп эсептейбиз. Мамлекет өз өлкөсүнө берилген, өз тарыхын аздектеген жана элибиздин руханий баалуулуктарын сактаган жаштарды ар дайым колдойт. Мен билимге болгон каалоосу күч, өз көз карашы бар, дүйнөнү жакшы жакка өзгөртүүгө умтулган, ар-намыстуу, мекенчил жаштардан көптү күтөм”, - деди Мамлекет башчысы.